قورقوت آتانگ کیتابیندأکی دألي دومرول دسسانی

دوخا غوجا اوغلي دألي دومرول

اوغوز ايللرينده دوخا غوجا اوغلي دألي دومرول ديين بير أر باردي. اول بير غوري چايينگ اوستوندن کؤپري غوروپ، کيم شوندان گچسه، اوتوز اوچ آقجا آلئپ، گچمديکدن-ده، غايتا اورا-اورا، قيرق آقجا آلاردي. موني اتمه‌سينينگ سبأبي اونونگ اؤزونه آشا گؤوني يتردي. اونسونگ اول: "دونيأده مندن دألي، مندن گويچلي أر تاپيلسا، اول منينگ بيلن ساواشا چئقسا. شوندا منينگ أرليگيم، باتئرلئغئم، چالاسئنلئغئم، ييگيتليگيم روما، شاما يتيپ، عألمه يايراردي!" دييردي.

بير گون شول کؤپرینينگ ياماجئنا بير اوبا گؤچوپ گلدي. شول اوبادا بير ياغشي ييگيت دونيأدن اؤتدي. آللانئنگ امري بيلن اول ييگيت اؤلدي. کيمسه اوغول دييیپ، کيمسه غارداش دييیپ، آغلاشدئلار. اول ييگيت اوچين اولي ياس باغلاندي. دوُيدانسئز يردن دألي دومرول بو اوبا آتئني چاپدئرئپ يتيپ گلیپ، آيدار: – منينگ کؤپریمينگ يانئندا نأمه اوچين آغلارسئنگئز، بو ياس، بو غووغا نأمه؟ اولار: – خانئم، بيزينگ بير یاغشی ييگيديميز باردي، شول اؤلدي، شونونگ اوچين آغلاشیارئس – ديييپ، جوغاپ برديلر. دألي دومرول: – سيزينگ اول ييگيدينگيزي کيم اؤلدوردي؟ – دييدي. اولار آيتديلار: – آللا تعالادان بویروق بولدي. آل غاناتلي عزراييل اونونگ جانئني آلدي. دألي دومرول: – اول آدامئنگ جانئني آليان عزراييل ديييأنئنگئز کيمدير؟ – ديييپ سورادي. – اي، قادير آللا، بيرليگينگ، بارلئغئنگ حاقي اوچين عزراييلي بير منينگ گؤزومه گؤرکز! اونونگ بيلن ساواشایئن، چکيشه‌یين، ديکلشه‌یين، بو یاغشی ييگيدينگ جانئني غورتارايين! غايديبام عزراييلي یاغشی ييگيتلرينگ جانئني آلماز يالي اده‌یین! – دييدي. دألي دومرول اول يردن غايتدي، دؤندي، اؤيونه گلدي. حاق تعالاغا دومرولئنگ سؤزي يوقمادي. – باقئنگ، باقئنگ! دألي کيشي منينگ بيرليگيمي بيلمز، بيرليگيمه شوکور قئلماز. منينگ درگأهيمدا من-منليک إیلأر– دييدي. عزراييلا بویروق اتدي: – عزراييل، سن بار-دا، اول دألي کيشينينگ گؤزونه گؤرونگيل. اونونگ منگزيني سارالتغئل! خارلادئپ، جانئني آلغئل! – دييدي. دألي دومرول قئرق ييگيدي بيلن ايييپ-ايچيپ اوتوراردي. دوُيداناسئز يردن عزراييل اونونگ غاپدالئندان چئقدي. عزراييلينگ اؤيه گيره‌نيني نه چاووش گؤردي، نه غاپي ساقچئسي. اينه، بيردن‌کأ دألي دومرولئنگ گؤرر گؤزي گؤرمز بولدي، توتار اللري توتماز بولدي، دونيأ-عألم گؤزلرينه غارانگقئراپ گؤروندي. دألي دومرول نر کيمین کوکرگيپ، غئغئردي: – جان، نه هايباتلي غوجا سن؟! غاپئچئلار سني گؤرمدي، چاووشلار سني دويمادي، منينگ گؤرر گؤزوم گؤرمز بولدي، توتار اللريم توتماز بولدي! تيترديم، جانئم جوشا گلدي، آلتئن کأسأم اليمدن يره غاچدي، آغزئمئنگ ايچي بوز کيبي، سونگکلريم دوز کيبي بولدي! اي، ساقغالجئغي آقجا غوجا، گؤزجاغازي چؤنگگه غوجا! مره، نه هايباتلي غوجا سن، دييگيل مانگا! غادام-بلام توقونار بو گون سانگا! – دييدي. شیله دييگیجه، عزراييلئنگ غاهاري گليپ: – اي، دألي، گؤزومينگ چؤنگگه‌ليگينه نأمه بگنمز سن، گؤزي گؤرکلي غئزلارئنگ، گلينلرينگ جانئني کؤپ آلدئم. ساققالئمئنگ آغارانئنا نأمه بگنمز سن، آق ساققاللي، غارا ساققاللي ييگيتلرينگ جانئني کؤپ آلدئم. ساققالئمئنگ آقلئغئنئنگ مانئسي بودور – دييدي.– هأ، يري، سن: "عزراييل بير اليمه دوشسه، اوني اؤلدوريپ، یاغشی ييگيتلرينگ جانئني اونونگ اليندن غورتارسام" دييرِدينگ. اينه، دألي، ايندي من سنينگ جانئنگي آلماغا گلديم. جانئنگي بررمينگ يا-دا منينگ بيلن جنگ ادرمينگ؟ – دييدي.

دألي دومرول: – هأ، شول آل غاناتلي عزراييل سنمي؟ – دييدي. عزراييل: – هاوا، من – دييدي. – شو یاغشی ييگيتلرينگ جانئني آليان هم سنمي؟ – هاوا، من. دألي دومرول: – آي، ساقلاولار، غاپئلاري ياپئشدئرئنگ! – ديييپ غئغئردي. سونگرا عزراييلا غاراپ: – من سنينگ بيلن گينگ يرده دوشوشماغي آرزوو ادرديم. امما دار يرده اليمه دوشدونگ، ايندي من سني اؤلدوريپ، یاغشی ييگيتلرينگ جانئني غورتارارئن! – دييدي. اول غارا غئلئجئني سئرئپ، عزراييلي چاپماق اوچين حمله قئلدي. عزراييل کپدري صيپاتئنا اؤوروليپ، پنجره‌دن چئقئپ، اوچوپ گيتدي. دألي دومرول ال چارپئپ، لاق- لاق گولدي. – ييگيتلر، گؤرونگ عزراييلي، من اوني غاتي غورقوزدئم، اول غئسسانجئنا گينگ غاپئني تاشلاپ، دار پنجره‌دن غوش بولوپ اوچوپ گيتدي، هر يره گيتسه-ده، من اوني سئپدئرمارئن! – دييدي. اول ياراغلانئپ آتلاندي، قوووپ گيتدي، ميداندا بير-ايکي ساني گؤگرچيني اؤلدوريپ، اؤيونه غايتدي. يولدا عزراييل اونونگ آتئنئنگ گؤزونه گؤروندي – آت اؤرکدي. دألي دومرولي گؤترئپ، يره چالدي. عزراييل اونونگ اوستونه مونوپ، بوغوپ باشلادي. دألئنئنگ بوغازي خارلاماغا باشلادي. دألي دومرول: – آي عزراييل، آمان! تانگرئنئنگ بيرليگينه يوقدور گومان. من سني بيله بيلمز ايديم، اوغرين جان آلدئغئنگ دويماز ايديم، دپه‌سي بييک بيزينگ داغلاريميز بولار، اول داغلاريميزدا باغلاريميز بولار، اول باغلارئنگ غارا سالقئملاري – اوزومي بولار، اول اوزومي سئقارلار – آل شرابي بولار. اول شراپدان ايچن اسريک بولار، شراپلار ايچديم دويمادئم – نه سؤزله‌ديم، بيلمه‌ديم، بگليک بيله اوسماديم. ييگيتليک بيله دويماديم – جانئم آلما، عزراييل، مِدِت! اوندا عزراييل آيتدي: – اي، دألي، مانگا نأمه يالبارار سن؟ آللاتاغالا يالبار. من هم بير يوموش اوغلاني، باشغا بير اليمدن گليأن زات يوق. دألي دومرول: – يا-دا جان بريپ، جان آليان آللا تاغالامي؟ – دييدي. – هاوا، شونونگ اؤزودير. – اوندا سن بو يرده نأمه ايشلأر سن؟ سن آرادان آيريل، من آللانئنگ اؤزي بيلن سؤزلشجک. سونگرا اول آللا يوزله‌نيپ: – سن هممه‌لردن بلنت سن، سن خود مؤمونلر کؤنگلونده ‌سن. اگر منينگ جانئمي آلماقچي بولسانگ، اؤزونگ آل، منينگ جانئمي عزراييلا آلدئرما! – دييدي. دألي دومرولئنگ بو سؤزلري خودايا خوش گلدي: – اي، عزراييل، دألي منينگ بيرليگيمه شوکور قئلدي؛ اي عزراييل، دألي دومرولا سؤيله: اگر دألي دومرول جان يرينه جان تاپئپ برسه، اونونگ اؤز جاني آزات بولسون! دألي دومرول آيديار: – من نأهيلي جان تاپايئن؟ يؤنه منينگ غارري آتام بيلن غارري انه‌م بار. گل، شولارئنگ يانئنا گيدیلي، بلکي، ايکيسيندن بيري جانئني برر. دألي دومرول سوردي، آتاسئنئنگ يانئنا گلدي، اونونگ اللريندن اوغشاپ، سؤيله‌ميش. گؤر‌لينگ، نه سؤيله‌ميش: – آق ساقغاللي، عزيز، عئززاتلي، جانئم آتام! بيلر بولسانگ، نألر بولدي: کوفور سؤز سؤزله‌ديم. حاق تعالانگ خوشونا گلمدي. گؤکدن آل غاناتلي عزراييلا امر اتدي. اول اوچوپ گليپ، دؤشومه باسئپ میندي هارلادئپ، منينگ سويجي جانئمي آلار بولدي. آتام، ايندي سندن جان ديلأر من، جان بررمينگ؟ یوغسا-دا، "اوغول، دألي دومرول!" دييیپ آغلارمي سن؟ اوندا آتاسي آيدار: – اوغول-اوغول، آي اوغول! جانئمئنگ پاراسي اوغول! دوغدوغئندا، دوقوز بوغرا اؤلدورديگيم، آرسلان اوغول! آلتئن توينوق آق اؤيومينگ غابساسي اوغول! غازا منگزأر غئزئمئنگ، گلنيمينگ گولي، اوغول! غارشيدأکي غارا داغئم گرکسه، سؤيله، گلسين، اول عزراييلينگ يايلاسي بولسون. سوووق سوولي بولاغلاريم گرکسه، اونگا ايچيت بولسون. تِبله-تِبله شاباز آتلارئم گرکسه، اونگا مينيت بولسون. خاتار-خاتار دويه‌لريم گرکسه، اونگا يوکلت بولسون. آغئلدأکي آقجا غوينوم گرکسه، اونگا اييميت بولسون. آلتئن، کوموش پول گرکسه، اونگا خارچلئک بولسون. بللي بيلگيل، دونيأ شيرين، جان سويجي، جانئم سانگا غييا بيلمن! يؤنه سؤيگولي انه‌نگ يانئنا بار، اول جانئني برر، بلکي؟ دألي دومرول آتاسئندان يوز تاپمان، سوروپ انه‌سينينگ يانئنا باردي. اول آيدار: – انه، بيلرمي سن نألر بولدي؟ گؤک يوزوندن آل غاناتلي عزراييل اوچوپ گلدي. منينگ دؤشومه باسئپ میندي، خارلادئپ، جانئمي آلار بولدي. آتامدان جان ديله‌ديم، برمدي. سندن جان ديلأرن، انه، جانئنگي مانگا بررمي سن؟ يوغسا-دا، "اوغول، دألي دومرول!" دييیپ آغلارمي سن؟ آجي دئرناق آق يوزونگه چالارمي سن؟ غارغا کيبي غارا ساچئنگ يولارمي سن، انه؟ – دييدي. انه‌سي اونگا بير سؤز دييميش، گؤره‌لينگ، نه سؤيله‌ميش. انه‌سي آيدار: – اوغول-اوغول، آي اوغول! دوقوز آي دار غارنئمدا گؤترديگيم اوغول، اون آي ديينده، دونيأ يوزونه گتيرديگيم اوغول، دولاپ-دولاپ آق سويدومي امديرديگيم اوغول، آقجا بورچلي حيصارلاردا توتولايدئنگ، اوغول، ساسي دينلي غاوور الينده توسساغ بولايدئنگ، اوغول، آلتئن آقجا گويجونه سئغئبان، سني غوتارايديم، اوغول، يامان يره بارمئش سن – بارا بيلمن. دونيأ شيرين، جان عزيز، جانئمي غييا بيلمن، بللي بيلگيل. انه‌سي هم جانئني برمه‌دي. عزراييل دألي دومرولئنگ جانئني آلماغا گلدي. دألي دومرول آيدار: – آي، عزراييل، آمان! تانگرئنئنگ بيرليگينه يوقدور گومان. اوندا عزراييل آيدار: – يري دألي، ايندي نه آمان ديلأر سن؟ آق ساقغاللي آتانگ يانئنا باردئنگ، جان برمدي. آق بورنجکلي انه‌نگ يانئنا باردئنگ، جان برمدي، ایندی کيم سانگا اؤز جانئني برسين؟ دألي دومرول: – حاسراتئم بار، شوني آيتسام! – دييدي. عزراييل آيتدي: – يري، دألي، حاسراتئنگ کيمدير؟ – منينگ يات غئزدان حالالئم بار! .اوندانام ايکي اوغلوم بار، بير-ده آماناتئم[غئزیم] ، اولارا [سونگکي] سارغئدئمي اتسم، سنم شوندان سونگ جانئمي آلسانگ. دألي دومرول سوردي، عايالئنئنگ يانئنا گلدي. آيدار: – بيلرمي سن نألر بولدي؟ گؤک يوزوندن آل غاناتلي عزراييل اوچوپ گلدي، منينگ گؤوسومه باسئپ غوندي، منينگ داتلي جانئمي آلار بولدي. آتامئنگ يانئنا باردئم، جان برمدي، انه‌مينگ يانئنا بارديم، جان برمدي، "دونيأ شيرين، جان سويجي" دييديلر. ايندي اولی غارا داغلارئم سانگا يايلاغ بولسون، سوووق-سوووق سوولارئم سانگا ايچيت بولسون، تبله-تبله شاباز آتلارئم سانگا مينيت بولسون، آلتئن توينوق آق اؤيوم سانگا کؤلگه بولسون، خاتار-خاتار دويه‌لريم سانگا يوکلت بولسون، آغئلدا آقجا گوينوم سانگا شوولن بولسون، گؤزونگ کيمي توتارسا، کؤنگلونگ کيمي سؤوِرسه، سن اونگا بارغئل. ايکي اوغلانجئغئمي اونگسوز غويماغئل – دييدي. اونونگ عايالي سؤيله‌ميش، گؤره‌لينگ، نه سؤيله‌ميش: – نه ديير سن، نه سؤيلأر سن؟! گؤزوم آچئپ گؤردوگيم! کؤنگول بريپ سؤیدوگيم! غوچ ييگيديم، شا ييگيديم! داتلي داماق بريپ، سوروشديگيم، بير ياسسئقدا باش غويوپ، اميشديگيم! غارشي ياتان غارا داغلاري سندن سونگرا من نيلأرم؟ يايلار اولسام، منينگ گؤروم بولسون، سوووق-سوووق سوولارئنگ ايچر بولسام، منينگ غانئم بولسون! آلتئن آقجانگ خارچلار بولسام، منينگ کفنيم بولسون، تبله-تبله شاباز آتئنگ مونر بولسام، تابئتئم بولسون! سندن سونگرا بير ييگيدي سؤووپ بارسام، بيله ياتسام، آلا ييلان بولوپ مني سوقسون! سنينگ اول موخاننث انه‌نگ-آتانگ بير جانئندا نه بار، سانگا غييماندئرلار! عارش تانئغ بولسون! کورس تانئغ بولسون! ير تانئغ بولسون! گؤک تانئغ بولسون! قادئر تانگري تانئغ بولسون! منينگ جانئم، سنينگ جانئنگا غوربان بولسون! – ديييپ، جانئني برمأگه راضي بولدي. عزراييل اول عايالئنگ جانئني آلماغا گلدي. امما آدامسئنئنگ يولداشئنا گؤزي غييمادي. اول خودايا يالباردي: – اي، اولي تانگريم! اولي يوللار اوستونده سنينگ اوچين عئماراتلار سالدئرايئن، آچ گؤرسم، دويرايئن – سنينگ اوچين؛ يالانگاچ گؤرسم، دون ياپايئن – سنينگ اوچين؛ آلسانگ، ايکيميزينگ جانئمئزي بيله آل، غويسانگ، ايکيميزينگ جانئمئزي بيله غويغول! – دييدي. دألي دومرولئنگ بو سؤزلري خودايا خوش ياقدي، اول عزراييلا بویروق اتدي. – دألي دومرولئنگ آتاسئنئنگ، انه‌سينينگ جانئني آل، اول ايکي حالالا يوز قئرق ييل عؤمور برديم! – دييدي. عزراييل اونونگ آتا-انه‌سينينگ جانئني آلدي. موندان سونگ دألي دومرول اؤز يولداشي بيلن يوز قئرق ييل ياشادي. دأدم غورقوت گليبأن، بوي-بويلادي، سوي سويلادي: – بو بوي دألي دومرولينگکي بولسون! اوني مندن سونگرا آلپ ارنلر سؤيله‌سين! آلني آچئق جومارت ارنلر دينگله‌سين! يوم برگين هاني: يرلي غارا داغلارئنگ يئقئلماسئن! کؤلگه‌ليجه غابا آغاجئنگ کسيلمسين! دولوپ آقان گؤرکلي سووونگ غوراماسئن! قادئر تانگري سني ناماردا زار اتمه‌سين! آق آلنئنگدا بأش کلمه دوغا قئلدئق، قابول بولسون! يئغسئن، دويرسون، گونأنگيزي آدي گؤرکلي پیغامبریميز دپ اتسين، خانئم هي!

کؤچورن: عباس ائلچین

تورکمنچه گؤچورن : کریم بهرامی